-ਅਸ਼ਵੀਰ, ਰਚਿਤ ਸੋਨੀ, ਧਰੁਵ, ਅਤੇ ਉਪਲਕਸ਼ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ
ਹੁਸ਼ਿਆਰਪੁਰ 7 ਅਪ੍ਰੈਲ (ਤਰਸੇਮ ਦੀਵਾਨਾ) – ਪੰਜਾਬ ਕ੍ਰਿਕਟ ਐਸੋਸੀਏਸ਼ਨ ਵੱਲੋਂ ਆਯੋਜਿਤ ਅੰਡਰ-23 ਅੰਤਰ-ਜ਼ਿਲ੍ਹਾ ਲੜਕੇ ਕ੍ਰਿਕਟ ਟੂਰਨਾਮੈਂਟ ਵਿੱਚ, ਹੁਸ਼ਿਆਰਪੁਰ ਦੀ ਟੀਮ ਨੇ ਫਤਿਹਗੜ੍ਹ ਸਾਹਿਬ ਟੀਮ ਉੱਤੇ ਆਪਣੀ ਪਹਿਲੀ ਪਾਰੀ ਦੀ ਬੜ੍ਹਤ ਦੇ ਆਧਾਰ ‘ਤੇ 3 ਅੰਕ ਹਾਸਲ ਕੀਤੇ। ਇਸ ਸਬੰਧ ਵਿੱਚ ਜਾਣਕਾਰੀ ਦਿੰਦੇ ਹੋਏ ਐਚਡੀਸੀਏ ਦੇ ਸਕੱਤਰ ਡਾ. ਰਮਨ ਘਈ ਨੇ ਦੱਸਿਆ ਕਿ ਹੁਸ਼ਿਆਰਪੁਰ ਦੀ ਟੀਮ ਨੇ ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ 346 ਦੌੜਾਂ ਬਣਾਈਆਂ। ਅਸ਼ਵੀਰ ਨੇ 105 ਦੌੜਾਂ, ਰਚਿਤ ਸੋਨੀ ਨੇ 99, ਹਰਮਨਦੀਪ ਨੇ 33, ਦਲਜਿੰਦਰ ਨੇ 34, ਉਪਲਕਸ਼ ਨੇ 33 ਅਤੇ ਅਭੈ ਪਠਾਨੀਆ ਨੇ 14 ਦੌੜਾਂ ਬਣਾਈਆਂ।
ਫਤਿਹਗੜ੍ਹ ਸਾਹਿਬ ਲਈ ਗੇਂਦਬਾਜ਼ੀ ਕਰਦੇ ਹੋਏ, ਸਾਹਿਲ ਭਾਸਕਰ ਨੇ 4 ਵਿਕਟਾਂ, ਰਿਮਨਜੀਤ ਨੇ 2, ਅਤੇ ਚਕਸ਼ਮ ਕਤਿਆਲ ਅਤੇ ਗੁਰਵਿੰਦਰਦੀਪ ਸਿੰਘ ਨੇ 1-1 ਵਿਕਟ ਲਈ। ਟੀਚੇ ਦਾ ਪਿੱਛਾ ਕਰਦੇ ਹੋਏ ਫਤਿਹਗੜ੍ਹ ਸਾਹਿਬ ਦੀ ਟੀਮ 132 ਦੌੜਾਂ ਤੱਕ ਹੀ ਸਿਮਟ ਗਈ। ਜਿਸ ਵਿੱਚ ਧਰੁਵ ਨੇ ਸ਼ਾਨਦਾਰ ਗੇਂਦਬਾਜ਼ੀ ਕੀਤੀ ਅਤੇ 6 ਵਿਕਟਾਂ ਲਈਆਂ, ਉਪਲਕਸ਼ ਸਿੰਘ ਨੇ 2 ਵਿਕਟਾਂ ਲਈਆਂ, ਅੰਮ੍ਰਿਤਪਾਲ ਅਤੇ ਕ੍ਰਿਸ਼ ਨੇ 1-1 ਖਿਡਾਰੀ ਨੂੰ ਆਊਟ ਕੀਤਾ। ਐਚਡੀਸੀਏ ਦੇ ਪ੍ਰਧਾਨ ਦਲਜੀਤ ਸਿੰਘ ਖੇਲਾ ਅਤੇ ਸਮੂਹ ਐਸੋਸੀਏਸ਼ਨ ਨੇ ਹੁਸ਼ਿਆਰਪੁਰ ਟੀਮ ਦੀ ਇਸ ਜਿੱਤ ‘ਤੇ ਖਿਡਾਰੀਆਂ ਨੂੰ ਵਧਾਈ ਦਿੱਤੀ।
ਜ਼ਿਲ੍ਹਾ ਕ੍ਰਿਕਟ ਕੋਚ ਦਲਜੀਤ ਸਿੰਘ, ਸਾਬਕਾ ਰਾਸ਼ਟਰੀ ਖਿਡਾਰੀ ਅਤੇ ਜ਼ਿਲ੍ਹਾ ਟ੍ਰੇਨਰ ਕੁਲਦੀਪ ਧਾਮੀ, ਮਹਿਲਾ ਕੋਚ ਦਵਿੰਦਰ ਕੌਰ, ਜੂਨੀਅਰ ਮਹਿਲਾ ਕੋਚ ਨਿਕਿਤਾ, ਜੂਨੀਅਰ ਕੋਚ ਦਲਜੀਤ ਧੀਮਾਨ, ਪੰਕਜ ਕੁਮਾਰ, ਪ੍ਰਵੀਨ ਸ਼ਿੰਟੂ ਦਿਨੇਸ਼ ਸ਼ਰਮਾ ਅਤੇ ਗਰਾਊਂਡਸਮੈਨ ਸੋਢੀ ਰਾਮ ਨੇ ਵੀ ਖਿਡਾਰੀਆਂ ਨੂੰ ਵਧਾਈ ਦਿੱਤੀ ਅਤੇ ਉਨ੍ਹਾਂ ਦਾ ਮਨੋਬਲ ਵਧਾਇਆ।